Scoil: Cathair Mhurchú, Cill Mhichíl.

O.S. Séamus Ó Laoighléis

Bailitheoir: Mícheál C. Ó Laoighléis

Faisnéiseoir: Mícheál Mac Con Luachra, 77mbliana, Cluain na Cille.

Cumtha ag: Tomás Ó Tighearnaigh

Fonn: Leagan macarónach ag Micho Russell bunaithe ar The Galway Races anseo ag 11.13 isteach: https://www.youtube.com/watch?v=nN7PK_yFU3g

An curfá seo aige idir na véarsaí:
Grá mo chroí mo chrúiscín sláinte geal mo mhúirnín
Grá mo chroí mo chrúiscín agus beidh sé lán

Amhránaí: Emer O Flaherty, Inis. Rinne sí leagan i Márta, 2022, bunaithe ar an bhfonn a bhí ag Micho Russell.

Nóta ó leabhar Mharion Gunn, ‘A Chomharsain Éistigí agus Amhráin eile ó Chontae an Chláir.’
Amhrán molta a cumadh timpeall na bliana 1837 nuair a dhein Cornelius O Brien M.P. oibreacha móra tógála thart faoi Dhaigh Bhríde.

Foinse: Bailiúchán na Scol
https://www.duchas.ie/ga/cbes/4922325/4870255

Tá obair ró-álainn dá dhéanamh ar an dtaobh seo,
Cúirt is caisleáin ar bharr Sliabh na gCaorach
Tá cúrsa breá ráis ann chomh breá is atá in Éirinn
Agus clochacha bána cópáilte ar gach taobh leis.

Tá uaisle Cláir Banba a’ tarraingt agus a’ trial ann
Stáblaithe dá gcapalla, coirce agus féar ann
Tá lán suas na sléibhte de thrúpaigh a’ trial ann
Agus dá dtagadh oiread eile bheadh tuilleadh ina ndiaidh ann

Ar mhaithibh mo thréanfhear dá mb’fhéidir liom cur síos air,
Níor mhór liom togha cléireach agus páipéar chun é a scríobh air,
Tá súil le mac Dé agam go bhfuil buíochas na naomh air
Ar son an obair ró-néata atá déanta ag Daigh-Bhríde.

Tá cros ar gach taobh de chun géilliúint dá bua
Agus altóirín néata chun stánadh uirthi anuas
Níl éinne do ghabhadh ann nár choir dó siúd guí leis,
É a thabhairt slán as gach bóthar is do ghabhainnse mo chroí leis.

Maidin bhreá Shamhraidh is an drúcht ar na féaraibh
Do thógfadh sé an smút díot le tiúinphort ag éanlaith
Na crannaibh ag lúbadh le húr ghlais i ngéaga
Ba bhreá a bheith fúthu ó mhór theas na gréine.

Ná tuigigí gur bláirneas* mo ráite mar ’mhaím
Ar an mbeithigh do thrácht mé le háilleacht a ghrinn,
Níl tráileacht ansúd ar bha ramhra ná méith-mholt
Agus go roinntear go húr iad gan cúntas le déanamh.

* blarney

Trascríobh ón gcartlann:

(I)
Tá obair ró áluinn dá déanamh ar an dtaobh seo
Cúirt is caisleáin ar bhárr Sliabh na gCaorach
Tá cúrsa breagh ráis ann chomh breagh is táin Éirinn
Agus clocaca bána cápáilte ar gac taobh leis

(II)
Tá uaisle Cláir Banba a tairringt agus a triall ann
Stáblaithe dá gcapalla coirce agus féar ann
Tá lán suas na sléibhte de truapaibh a triall ann
Agus dá dtagadh oiread eile bheadh tuille 'na ndiaidh ann

(III)
Ar mhaithibh mo thréanfhear da mbéidhir liom cur sios air
Níor mhór liom toghadh cléireach agus páipéar chum é scríobh air
Tá súil le mach Dé agam go bhfuil buidheachas na naomh air
Ar slus an obair ró-néata atá déanta ag deagh-bhríoghda

(IV)
Tá cros ar gach taobh de chum geilleamhaint da buadhadh
Agus altóirin néata chum staondha uirthi anuas
Níl aonne do gheóbhfadhann nár cóir dó súid guidheamh leis.
É thabhairt slán as gach bóthar is do gheobhfainn-se mo chroidhe leis.

(V)
Maidean bhréagh Samhraidh is an drúcht ar na féaraibh
Do thógfadh-se an smút díot le tuanphort ag éanlaith
Na crannaibh ag lúbadh le úr ghlais i ngéaga
Ba bhréagh bheith fuatha ó mhór theas na gréine

(VI)
Ná tuigigé gur bláirneas mo raidhte mar mhaoidheamh
Ar an mbeithigh do thracht mé le h-aileacht a ghrínn
Níl tráileacht annsud ar bha riamhra, ná méith-mhalt
Agus go roinntear go h-úr iad gan cuinntas le déanamh.